Trinke isch gsung, aber was?!

Viu Trinke isch jo scho grundsätzlech guet füre Körper. Für d’Stimm aber ganz bsungers! Bessergseit für d’Schlymhüt. Vor auem im Winter, isch es gfährlech, dass d’Schlymhüt uströchne u viu afäuiger für Entzündige sy. Mit viu trinke cha me däm entgäge würke. Drbi trinkt me gschider Schlückliwys anstatt uf einisch e Schwetti. Was me trinkt u wenn dass me trinkt, das isch no entscheidend.

Wysse Wy isch entgäge dr autygsässne Meinig sicher nid s’beschte zum Singe. Meischtens isch dr wyss Wy chaut u tröchnet d’Schlymhüt ender us.

Warmi oder lääii Getränkt sy sicher besser aus chauti! Tee isch geng guet. Chrütter- oder Früchtetee zum Bischpiu. Beliebt isch Salbei-Tee. Är isch entzündigshemmend u liecht tröchnend. Gäge s’Uströchne vo de Schlymhüt cha me guet e chli Honig yrüehre, de isch är o no grad chli besser z’näh. We’s übrigens churz vorem Singe chli uströchnet, isch das nid so schlimm. Es git sogar eher e klari Stimm. Grad wäg dr desinfizierende Würkig isch ou Ingwer-Tee sehr beliebt. Eifach früsche Ingwer rüschte, dünni Schibe schnide u i heissem Wasser lo zieh. Je meh Ingwer u je lenger zoge, desto schärfer. Chli Honig dri u fertig. Bubieifach!

Getränk mit Cholesüri si widerum nid z’empfähle. Näbscht em Ufstoosse, wo grad bim Singe gar nid gäbig isch, tröchnet d’Cholesüüri o sehr us.

Starch schlymendi Getränk, wi zum Bispiu Miuch si nachem Singe zum Pflege z’empfähle. Während oder unmittubar vorem Singe isch es eher hinderlech.

Auso: Keni chaute Getränk. Zur Erholig oder wyt im Vorfäud schlymende Getränk. Churz vorem Singe, darf’s o chli tröchne für ne klari Stimm. Salbei oder Ingwer mit entzündigshemmender Würkig isch optimau mit chli Honig.