Schwige u ysinge bruchts, di gueti Mischig zwüsche schone u ufwerme.
Vorem Singe viu oder lut rede isch nid z’empfähle. Grad we me e Bruef het, wo me viu mues rede, zum Bischpiu aus Lehrer, im Büro am Telefon oder im Verchouf. Oder imene Bruef wo me lut mues rede, bischpiuswys uf Bousteue, öppe no im Stoub. Do lydet d’Stimm. Do schadt’s nid, we me vorem Singe ou einisch e Chehr lang gar nüt seit, we das geit.

E Chautstart isch für d’Stimm ou nid guet. Süüferli ysinge, zersch nume summe. Nid grad i de verruckte Tonlage ganz obe oder ganz unge. Zersch am beschte müglechscht uf dere Höche wo me ou redt. När cha me langsam dr Tonumfang erwitere. Drby dr Chifer schön locker lo, o bim Summe, nid uf d’Zäng bysse. Eher a s’Ginä däiche.

Jede het e angeri Stimm u es isch o nid jede Tag glich. De brucht o jede mänggisch meh oder weniger lang zum Ysinge. Aber so 10 Minute dörfe’s scho sy.

Es schadt ou nüt, einisch e Jodlerkurs oder e Gsangsstung z’bsueche, Agebot git’s zum Glück gnue. Dert chöi si eim geziuti Üebige zeige. U we si se eim nid vo sich us zeige: Froge!

Es haute ou nid aui glich viu vom Ysinge. We du merksch, dass es dir bim Singe besser geit, we du vorhär ygsunge hesch, de mach’s! Villech haut für di, alleini, we’d unger dr Duschi steisch, dr Mutz aleisch oder im Outo zum Uftritt oder a d’Prob fahrsch. Glägeheite git’s geng.

Probiere geit über studiere… Es git Lüt wo säge, si bruchi das nid. Es heig ihm gschadt, het aber no niemmer gseit.

Verschideni Kursagebot